A tarifa 2.0TD períodos

¡ATENCIÓN!

O Goberno español aprobou a rebaixa do IVE da factura eléctrica do 21 até o 10 %. A medida, vixente até o 31 de decembro de 2024, afecta aos contratos de até 10 kW de potencia, e aplícase sempre que o prezo da enerxía ao mercado non baixe considerabelmente. Podedes ver os detalles da medida nesta noticia.

As tarifa 2.0TD períodos e 2.0TD indexada son as tarifas de todos os contratos que teñen unha potencia contratada de até 15 kW (incluídos) e baixa tensión. Isto abrangue a gran maioría de puntos de subministración domésticos, pequenas empresas, despachos, oficinas, etc.

Para estes casos, existen dúas tarifas dispoñíbeis para cada zona (Península, Baleares, Canarias):

Tarifa 2.0TD períodos
Taxa 2.0TD indexada

Neste artigo explicamos as características da tarifa 2.0TD períodos (as da tarifa 2.0TD indexada nestoutro, e tamén temos dispoñíbel unha comparación entre as dúas tarifas).

Falamos agora, daquela, dos seguintes puntos, en relación coa tarifa 2.0TD períodos:

Características da tarifa 2.0TD períodos

Para a tarifa 2.0TD períodos, Som Energia fai previsións e compra a enerxía con meses de antelación a mercados de futuros. Por iso, os prezos poden fixarse con antelación. Se o mercado diario da enerxía ten flutuacións, tanto á alza como á baixa, estas non afectan directamente as persoas e empresas usuarias.

Termo de enerxía

Daquela, na tarifa 2.0TD períodos hai 3 períodos horarios de enerxía, cada un cun prezo diferente:

Período val de enerxía: de 00 a 8 h da mañá. Durante este período, a enerxía é máis económica.
Período chan de enerxía: de 8 a 10 h, de 14 a 18 h e de 22 a 00 h. Durante este período, a enerxía non é tan económica como no período val, nin tan cara como no período punta.
Período punta de enerxía: de 10 a 14 h e de 18 a 22 h. Durante este período, a enerxía é máis cara.

Se queres imprimir esta imaxe para tela nun sitio visíbel, podes descargala aquí.

Termo de potencia

A potencia, grosso modo, é o que permite ter máis ou menos aparellos electrónicos funcionando ao tempo. A tarifa 2.0TD períodos conta con 2 períodos de potencia, o que significa que se poden contratar dúas potencias diferentes segundo o período:

Período punta-chan: de 8 h a 24 h (en días laborábeis).
Período val: de 00 a 8 h da mañá, e todas as horas das fins de semana e festivos estatais.

Nestoutro artigo do Centro de Axuda explicamos como se factura o termo de potencia.

Se non revisaches se a potencia que tes contratada é a que realmente precisas, recomendámosche que revises cal sería a túa potencia contratada idónea e, se ven que a podes diminuír, pedir unha modificación de potencia (pode facerse a través da Oficina Virtual).

Maioritariamente, non pagará a pena tentar baixar a potencia contratada no período val, xa que, dado que o prezo de potencia para este período é moi económico, o aforro será minúsculo.

Consellos de aforro para a tarifa 2.0TD períodos

O feito de que haxa tres períodos de enerxía e dous períodos de potencia permite diferentes casuísticas que hai que valorar para mellorar o aforro de enerxía eléctrica. Hai dous xeitos en que podes actuar para tentar conseguir máis aforro:

Que haxa diferentes períodos de enerxía, tamén con prezos diferentes, incentiva a axustar máis os usos de electricidade nos treitos en que é máis económica.
- Por exemplo, se dispós dun termo eléctrico de auga quente programábel, ou en xeral calquera aparello (lavadora, lavalouza...) podes programalo de xeito que se poña en marcha pola noite (durante o período val, o máis económico).
- Tamén pode ser útil organizarse para utilizar a lavadora e outros electrodomésticos durante as fins de semana, que tamén son do período val, o máis económico.
Se tes un aparello que requira bastante potencia e que non importe a hora en que utiliza a enerxía, por exemplo, un acumulador de auga quente, ou coche eléctrico que queiras cargar rapidamente, podes contratar unha potencia superior polas noites e fins de semana (período val) e cargalo entón. Deste xeito, aforrarás ter que contratar (e pagar) unha potencia superior durante todo o día.

Cambio de prezos da tarifa 2.0TD períodos

Os prezos, fixados por Som Energia, avísanse con 30 días de antelación e mantéñense ata que facemos un novo cambio de prezos. Só existe unha excepción, e é no caso en que se aproba unha nova regulación que modifica algún dos importes para pagar por consumir enerxía (por exemplo, o IVE, os cargos ou as peaxes). Neste caso, os cambios deben aplicarse no momento e non se pode deixar a marxe de 30 días.