Prezo de compensación de excedentes en autoprodución
| [També en: català] | [También en: castellano] | [Euskaraz ere eskuragarri] |
O excedente de autoprodución
A enerxía que non utilizan as persoas que teñen instalacións de autoprodución na súa casa e que se pasa á rede eléctrica denomínase excedente de autoprodución. A normativa marca que as persoas con instalacións de autoprodución doméstica que o desexen poden acollerse á compensación simplificada dos excedentes de enerxía producidos que se acaben inxectando á rede.
Tal e como dicimos neste artigo, onde explicamos como funciona a compensación simplificada de excedentes, a normativa marca que a compensación dos excedentes debe facerse mensualmente a partir do valor económico destes excedentes. E esta compensación alóngase até que o balance entre o valor da enerxía excedentaria e o valor da enerxía consumida sexa cero.
Som Energia compensa as persoas que teñen excedentes de autoprodución descontándoos da factura.
Prezo dos excedentes
Co obxectivo de ofrecer unha proposta que sexa favorábel aos intereses tanto das persoas e entidades socias con autoconsumo como de Som Energia, desde a cooperativa definiuse o prezo de compra destes excedentes ao mesmo valor de referencia do custo da enerxía que usamos para calcular o prezo de venda. É dicir, o custo da enerxía que a cooperativa compra no mercado eléctrico para comercializar será o que se aplicará tamén á enerxía excedentaria da autoprodución.
Nesta ligazón explicamos por que o prezo de compensación dos excedentes de autoprodución e o prezo de venda (das nosas tarifas) teñen valores diferentes. E nestoutro artigo, explicamos con detalle como establecemos os prezos en Som Energia. Ten presente que os criterios para establecer as tarifas xerais que ofrecemos decidímolos entre todas as persoas e entidades socias na Asemblea Xeral.
Tarifa períodos, con prezos fixos
Nas tarifas períodos, de prezos fixos, os excedentes de autoprodución compénsanse tamén a prezo fixo para todos os períodos. Este prezo podes atopalo actualizado na sección de tarifas da páxina web.
Tarifa indexada, con prezos variábeis
Se a túa tarifa é indexada, o prezo de compensación que aplicará Som Energia tamén será indexado; isto quere dicir que tamén varía día a día e hora a hora. O prezo de compensación dos excedentes será o prezo horario do mercado grosista da electricidade, que é o prezo de OMIE nos contratos da Península e o prezo horario da demanda nas illas Baleares e Canarias.
Compensación de excedentes en Som Energia
Cada comercializadora do mercado libre establece o seu propio xeito de compensar, así como o prezo de compensación que queira definir.
Así, no mesmo momento (2019) en que mudou a normativa sobre o autoconsumo, desde Som Energia establecemos a compensación da enerxía, e especificamente tamén a parte correspondente das peaxes e cargos do termo de enerxía.
Ao tempo, debemos ter en conta que o operador do sistema (Red Eléctrica de España) asigna á comercializadora os excedentes non compensados nos meses nos que o importe total dos excedentes é superior ao importe da enerxía consumida. Isto dá pé ás comercializadoras do mercado libre a ir alén do que establece a normativa e valorar economicamente esta enerxía. Baseándonos neste feito, a Asemblea de persoas e entidades socias de Som Energia aprobou en 2022 que o equipo técnico da cooperativa traballase para pór en marcha un servizo para valorar estes excedentes non compensados. Actualmente, estamos a traballar intensamente para poder ofrecer este servizo canto antes.