Diferenza entre o prezo de compensación dos excedentes de autoprodución e o prezo de compra

Se revisas as tarifas por períodos que ofrecemos, podes observar que o prezo de compensación dos excedentes de autoprodución sempre é inferior ao prezo de compra da enerxía, sexa cal sexa o período no que fagas a comparación.

Para entender esta diferenza debes ter en conta que o prezo ao que vendemos a enerxía nas tarifas da cooperativa é, basicamente, a suma dos seguintes conceptos:

• Prezo da enerxía.
• Custos regulados que se determinan por lei, que inclúen:
  • Peaxes de acceso definidos pola CNMC.
    • Rede de transporte e distribución.
  • Cargos definidos polo ministerio correspondente.
    • Prima nas renovábeis, coxeración e residuos (RECORE).
    • Déficit do sistema eléctrico.
    • Retribución dos sistemas non peninsulares.
    • Taxa CNMC.
    • Plan xeral de residuos radioactivos.
• Custos do sistema:
  • Pagamentos por capacidade.
  • Sobrecustos pola xestión da rede.
  • Perdas da rede.
• Certificados en garantía de orixe
• Marxe de comercialización.

A estes conceptos hai que sumar os impostos correspondentes.

Pola súa parte, o prezo de compensación dos excedentes non inclúe moitos destes conceptos, que non se lle aplican. É o caso dos custes regulados (peaxes e cargos), os custos do sistema e a marxe de comercialización. Por iso, o prezo resultante é inferior ao prezo das tarifas da cooperativa, xa que corresponde unicamente ao prezo da enerxía que establecemos de referencia, como prezo de custo. Este prezo definímolo cada vez que cambiamos as tarifas e é único para todos os períodos e tarifas.

O prezo de referencia

O prezo de referencia que collemos para realizar a compensación é a media do que nos custa, como cooperativa, a enerxía equivalente. Como a enerxía que compensamos está xerada en horas de sol, collemos como referencia o que nos custa a enerxía nesas mesmas horas de sol.

A produción e a demanda de enerxía en horas de sol

Nos últimos anos, produciuse un auxe das instalacións de placas fotovoltaicas, tanto no ámbito particular coma industrial, que xeran —claro está— máis enerxía. Non aumentou tanto a demanda enerxética nas horas de produción solar, o que provoca que o prezo da enerxía en horas solares a miúdo sexa especialmente baixo. Ten en conta que, ás veces, a produción é mesmo superior á demanda.

Adaptármonos ao planeta, non ao revés

Como sociedade temos o reto de trasladar os consumos enerxéticos ás horas de produción da enerxía, que, neste caso, é solar. Desde Som Energia estamos a estudar medidas para incentivalo, como poden ser novas tarifas ou adaptar as actuais.

En certo modo, somos as persoas as que nos temos que adaptar aos recursos que ten o planeta, non pretender que o planeta resolva todas as nosas «necesidades». A electricidade é un ben básico e finito. Como tal, é importante non desbaldilo e facer un uso consciente. Así pois, empregar a luz nas horas de máxima produción tamén axuda á mudanza do modelo enerxético que impulsamos desde a cooperativa.