Que é o servizo da Rede de Empresas Instaladoras (REI)?

Cales son os obxectivos do servizo?

- Avanzar cara á soberanía enerxética favorecendo o uso eléctrico para axudar á descarbonización na túa casa ou na túa empresa, entidade ou organización.

- Acompañarte na transición cara ao autoconsumo. É dicir, queremos que deixes de ser só consumidor/a de enerxía verde e pases a ser tamén produtor/a.

Quen pode gozar deste servizo?

A REI é un servizo exclusivo para persoas, entidades e empresas socias de Som Energia que queiran implantar medidas para avanzaren cara á soberanía enerxética.

Cales son os seus principais beneficios?

1. Gozar de descontos: só por seres socia de Som Energia, as empresas da REI ofreceranche un 3 % de desconto nos orzamentos que solicites.
2. Gañar seguridade á hora de investir en novas medidas enerxéticas, porque en Som Energia validamos as empresas que forman parte da REI.
3. Reducir tempo para buscar empresas instaladoras de confianza expertas en instalacións enerxéticas eficientes.

Cal é o perfil das empresas que forman parte da REI?

Son empresas que demostraron a súa solvencia económica e técnica e que foron validadas por Som Energia. Sabemos que traballan con profesionalidade, prezos xustos e materiais de calidade. Ademais, comparten os nosos valores de transformación do modelo enerxético.

Que servizos ofrecen as empresas da REI?

1. Instalacións fotovoltaicas para xerar enerxía renovábel, tanto no ámbito doméstico como en entidades e empresas.
2. Instalacións colectivas para que a enerxía xerada se distribúa entre as diferentes vivendas e as zonas comúns.
3. Mantemento de instalacións para garantir o rendemento máximo e a durabilidade de calquera sistema fotovoltaico.
4. Ampliacións fotovoltaicas para instalar novos paneis.
5. Aerotermia e climatización para substituír o gas por unha tecnoloxía limpa e eléctrica.
6. Puntos de recarga de vehículo eléctrico adaptados ás necesidades de potencia de cada garaxe ou aparcadoiro.
7. Baterías e almacenamento para xestionar os excedentes e aproveitar a enerxía autoxerada en calquera momento do día.
8. Sistemas de apoio de enerxía para garantir a subministración eléctrica básica na vivenda ou empresa no caso dun corte na rede xeral.
9. Xestión intelixente da enerxía (a través da IA) para decidir o mellor momento para consumir, cargar baterías ou verter excedentes.

Que pasa se xorde algún problema durante o proceso de instalación?

En Som Energia ofrecemos apoio para resolver dúbidas ou para axudar a solucionar calquera incidencia que poida xurdir.

Que teño que facer se estou interesada no servizo?

Só tes que entrar no noso sitio web e cubrir este formulario cos teus datos. Nós encargarémonos de envialos ás empresas da túa zona, que se porán en contacto contigo.

Onde ofrecen servizo as empresas da REI?

O servizo da REI está en fase de expansión e en Som Energia estamos traballando para chegarmos a todas as partes.

-De momento, o servizo ofrece cobertura en toda Cataluña, no País Valenciano, no País Vasco, en Navarra, en Madrid, na Rioxa, en Aragón e en Andalucía.

-Nas Illas Baleares, está dispoñíbel en Eivisa e Formentera.

- En Castela-A Mancha, nalgunhas zonas de Guadalaxara e Toledo.